ភាពផ្សេងគ្នានៃផ្លូវភេទ
បូរ៉ា៖ ជាក្មេងប្រុសវ័យជំទង់ដែលមានទំនោរស្រលាញ់ភេទដូចគ្នា ហើយមានភាពជិតស្និតជាមួយវត្តី ពួកគេតែងជជែក និងចែករំលែកចំណេះដឹងនានាជុំវិញភាពប្រែប្រួលវ័យជំទង់។ ឥឡូវនេះប្អូនៗនឹងបានស្វែងយល់បន្ថែមទៀតពីភាពផ្សេងគ្នានៃផ្លូវភេទ តាមរយៈការសន្ទនារវាង វត្តី និង បូរ៉ា៖
វត្តី៖ បូរ៉ា! យើងសួរឯងមួយមើល?
បូរ៉ា៖ សួរមកវត្តី! ឯងមានរឿងអី ជជែកគ្នារាល់តែថ្ងៃហើយធ្វើឯងមកសួរអីណា?
វត្តី៖ នែ! បូរ៉ាគ្នាឆ្ងល់ណាស់ ហេតុអ្វីបានជាមនុស្សយើងហា៎ ឃើញក្មេងប្រុសខ្លះស្រឡាញ់ស្រី ហើយក្មេងប្រុសខ្លះស្រឡាញ់ប្រុស មិចបានមនុស្សយើងប្លែកៗពីគ្នាចឹងណ៎?
បូរ៉ា៖ អើ! ឯងនិយាយដូចជាចង់ឌឺគ្នាម៉ងហា៎។ នែ៎ វត្តី! ភាពខុសគ្នានៃចំណង់ ឥរិយាបថ និងអត្តសញ្ញាណយេនឌ័ររបស់មនុស្ស ត្រូវបានគេហៅថា ភាពផ្សេងគ្នានៃរឿងទំនោរផ្លូវភេទ។ មនុស្សម្នាក់ៗអាចមានអារម្មណ៍ស្រឡាញ់ ទាក់ទាញ និងចំណង់ផ្លូវភេទចំពោះមនុស្សភេទផ្សេងគ្នា ភេទដូចគ្នា ឬទាំងពីរភេទក៏បានដែរ។
វត្តី៖ អរចឹងផង! គ្នាទើបតែដឹង មើលបូរ៉ាឯងជួយប្រាប់គ្នាបន្តិចទៀតបានទេព្រោះអីគ្នាដូចអត់ទាន់ច្បាស់ តើឯងអាចប្រាប់គ្នាលម្អិតបន្តិចទៀតបានអត់?
បូរ៉ា៖ មិនអីទេ! មនុស្សមួយចំនួនបានស្រឡាញ់និងរួមភេទជាមួយភេទផ្ទុយគ្នា (បុរស និងនារី) និងមួយចំនួនទៀត បានស្រឡាញ់និងរួមភេទជាមួយអ្នកមានភេទខុសគ្នា និងមានភេទដូចគ្នាផងដែរ។
វត្តី៖ បូរ៉ា ចឹងរឿងនិងវាកើតតែក្នុងប្រទេសយើងឬយ៉ាងមិច?ចុះប្រទេសនៅលើពិភពលោកយ៉ាងមិចដែរ ឬ ក៏មានតែប្រទេសយើងទេ?
បូរ៉ា៖ មិនមែនទេវត្តី ភាពខុសគ្នានេះ គឺជារឿងពិតនៅលើពិភពលោក ហើយបានកើតឡើងនៅគ្រប់សង្គមទាំងអស់។ តែវាខុសគ្នាថាសង្គមខ្លះបានទទួលស្គាល់ការស្រលាញ់ភេទដូចគ្នា រីឯសង្គមខ្លះទៀតនៅមិនទាន់ទទួលស្គាល់ការស្រឡាញ់ភេទដូចគ្នានៅឡើយទេ។
វត្តី៖ ចឹង! ចុះហេតុអ្វីបានជាវាមានភាពខុសៗគ្នាចឹង?
បូរ៉ា៖ មនុស្សដែលមានអត្តសញ្ញាណយេនឌ័រខុសពីភេទដែលបានកំណត់ពីកំណើត គេហៅថា មនុស្សស្រលាញ់ភេទដូចគ្នា ។ មនុស្សស្រលាញ់ភេទដូចគ្នា អាចមានការទាក់ទាញពីមនុស្សភេទដូចគ្នា ភេទខុសគ្នា ឬទាំងពីរភេទ។
វត្តី៖ អូ៎រចឹង! ហើយចុះបូរ៉ាឯងមិចចុះ?
បូរ៉ា៖ យី! ឯងនេះសួរអីចឹង! អានិងវាជារឿងឯកជនរបស់គ្នាតើ! គ្នាគិតមិចក៏បានដែរ!
វត្តី៖ អរ! សុំទោសបូរ៉ា គ្នាសុំទោស និងហើយវាជាសិទ្ធរបស់បូរ៉ាចឹងឱ្យគ្នាសុំទោសណា ព្រោះយើងមិនអាចវិនិច្ឆ័យ ឬក៏សួររឿង អត្តសញ្ញាណភេទចំពោះអ្នកផ្សេងបានទេ អរគុណឯងហើយដែលបានរំលឹកខ្ញុំ។
និងហើយបូរ៉ាអរគុណដែលមិនខឹងខ្ញុំដែលសួរអំពីរឯងបែបនេះ ប៉ុន្តែបូរ៉ាខ្ញុំចង់ដឹងបន្ថែម មូលហេតុអ្វីបានជាមនុស្សយើងមានចំណង់ផ្លូវភេទ ឬក៏ស្រឡាញ់ភេទដូចគ្នាផងផ្ទុយគ្នាផងឬក៏ទាំងពីរភេទចឹងហ្ន?
បូរ៉ា៖ វត្តី! មនុស្សយើងមួយចំនួនមិនចង់ឱ្យគេកំណត់ ឬចាត់ថ្នាក់ចំពោះបញ្ហាផ្លូវភេទ ឬអត្តសញ្ញាណផ្លូវភេទរបស់ពួកគេឡើយ។ ពិភពលោកនៅមិនទាន់ យល់ច្បាស់ពីមូលហេតុដែលបណ្តាលឱ្យបុគ្គលម្នាក់មាន ចំណង់ផ្លូវភេទចំពោះភេទដូចគ្នា ភេទផ្ទុយគ្នា ឬទាំងពីរភេទឡើយ។
វត្តី៖ អូ៎រចឹង! ចឹងគេអត់ទាន់រកពីមូលហេតុឃើញទេហ៎? ចុះបើសិនជាគេរកមូលហេតុមិនទាន់ឃើញចឹង តើយើងអាចធ្វើការផ្លាស់ប្ដូរចំណង់ផ្លូវភេទបានទេ?
បូរ៉ា៖ ទេ! វត្តី! ចំណង់ផ្លូវភេទនេះ មិនអាចផ្លាស់ប្តូរដោយសាសនា ការព្យាបាល ឬអន្តរាគមន៍ផ្នែកវេជ្ជសាស្ត្របានឡើយ។ ចំណង់ ផ្លូវភេទ ឬឥរិយាបថផ្លូវភេទ ឬអត្តសញ្ញាណផ្លូវភេទយេនឌ័ររបស់បុគ្គលម្នាក់ អាចផ្លាស់ប្ដូរទៅតាមពេលវេលា និងពីស្ថានភាពមួយទៅស្ថានភាពមួយទៀត។
វត្តី៖ អូរចឹង! ចឹងតើមនុស្សយើងអាចមានសិទ្ធស្រឡាញ់មនុស្សមានភេទដូចគ្នាឬក៏មិនដូចគ្នាបានហើយចឹង? តើវាមានទោសឬអត់?
បូរ៉ា៖ មិនអីទេ ឥរិយាបថទំនោរផ្លូវភេទរបស់មនុស្សមិនដូចគ្នាទេ មនុស្សជាច្រើនស្រឡាញ់ភេទផ្ទុយគ្នា ហើយក៏ មានមួយចំនួនទៀតជាអ្នកស្រឡាញ់ភេទដូចគ្នា និងខ្លះទៀតជាអ្នកស្រឡាញ់ភេទទាំងពីរផងដែរ។
វត្តី៖ អរ! ចឹងខ្ញុំយល់ហើយ ចឹងនេះក៏វាជាសិទ្ធរបស់បុគ្គលម្នាក់ៗដែរ តាស់។ ចុះការសម្រេចចិត្តផ្សេងៗនឹងវាជារឿងរបស់បុគ្គលឬក៏មនុស្សទាំងអស់គ្នាអាចមានសិទ្ធដឹងលឺបានដែរ?
បូរ៉ា៖ ទេ! ការសម្រេចចិត្តនិងជ្រើសរើសរកដៃគូរួមភេទគឺជាសិទ្ធិរបស់មនុស្សដោយផ្អែកលើការព្រមព្រៀង និងគោរពគ្នាទៅវិញទៅមក។ ភាពខុសគ្នា អត្តសញ្ញាណផ្លូវភេទយេនឌ័រ គឺជាជីវិតឯកជនរបស់មនុស្សម្នាក់ៗ។
វត្តី៖ អរ!បូរ៉ា គ្នាដើរលេងជាមួយឯងរាល់ដងជជែកគ្នាមិនដែលបានដឹងរឿងនឹងសោះ ហេតុអ្វីបានជាពីមុនឯងមិនដែលនិយាយប្រាប់គ្នាផង។
ប៉ូរា៖ ធ្លាប់និយាយប្រាប់ខ្លះដែរ តែមកពីឯងមិនសូវចាប់អារម្មណ៍។ ចុះវត្តីឯងនឹងធ្វើអ្វីបន្តចុះ?
វត្តី៖អរគុណចំពោះការចែករំលែកចំណេះដឹងទាំងនេះ ខ្ញុំនឹងជួយចែករំលែកចំណេះដឹងនេះទៅមិត្តភក្តិយើងផងព្រោះពេលខ្លះមិត្តភក្តិយើងក្នុងថ្នាក់រៀនគាត់ក៏មិនសូវដឹងពីរឿងនឹងដែរ តែបើគាត់ដឹងរឿងនឹងច្រើនទៅអាចនឹងធ្វើអោយយើងមានការគោរពសិទ្ធគ្នាកាន់តែប្រសើរ ហើយអាចរក្សាជីវិតឯកជនរបស់មនុស្សម្នាក់ៗឲ្យកាន់តែថ្លៃថ្នូរប្រសើរឡើងទៀតផង។
បូរ៉ា៖ តែកុំបញ្ចេញឈ្មោះគ្នាណា!
វត្តី៖ ដឹងហើយការរក្សាការសម្ងាត់ជាក្រមសីលធម៌ ដែលត្រូវធ្វើជាដាច់ខាតព្រោះវាជាសិទ្ធិមនុស្ស និង ហើយវាខុសនឹងច្បាប់ពីការរំលោភសេចក្តីទុកចិត្ត។
ប្រភពនិងឯកសារយោង៖
ឯកសារយោង៖ ក្រសួងអប់រំយុវជននិងកីឡា សៀវភៅថ្នាក់ទី១០ បោះពុម្ភ ថ្ងៃទី១៦ខែមីនា ឆ្នាំ២០២១ ជំពូក២ មេរៀនទី២ ទំព័រទី៧២ ដល់៧៥
ទាញយកឯកសារ
អប់រំសុខភាពថ្នាក់ទី១០