ចំណង់ផ្លូវភេទ
សួស្តីប្អូនៗ ក្រោយពីបានយល់ពីមធ្យោបាយពន្យាកំណើត តាមរយៈការសន្ទនារវាង វត្តី និង អ្នកគ្រូពេទ្យ ចិន្តា ឥឡូវនេះប្អូននឹងបានស្វែងយល់បន្ថែមទៀតពីចំណង់ផ្លូវភេទ តាមរយៈការសន្ទនារវាង វត្តី និង ធីតា
ធីតា៖ សួស្តីវត្តី! ខ្ញុំមានចម្ងល់មួយចង់សួរឯង គ្នាធ្លាប់តែលឺពាក្យថាចំណង់ចំណូលចិត្តឬចំណង់អាហារចុះ តើអ្វីទៅជាចំណង់ផ្លូវភេទនោះ?
វត្តី៖ ចំណង់ផ្លូវភេទ គឺ ជាបំណងប្រាថ្នាសម្រាប់សកម្មភាពផ្លូវភេទ ហើយចំណង់ផ្លូវភេទត្រូវបានកំណត់ដោយ កត្តាជីវសាស្ត្រផ្លូវចិត្ត និង សង្គម។
ធីតា៖ បើអញ្ចឹង! តើចំណង់ផ្លូវភេទរបស់មនុស្សកើតមានលក្ខណៈយ៉ាងមិចទៅ?
វត្តី៖ ចំណង់ផ្លូវភេទរបស់មនុស្សមានលក្ខណៈខុសៗទៅតាមភេទ អាយុ សាសនា វប្បធម៌ ប្រពៃណី ទំនៀមទម្លាប់ ចំណេះដឹង សុខភាព និងជីវភាពរស់នៅប្រចាំថ្ងៃ។
ធីតា៖ អរ អីចឹងផង!
វត្តី៖ មែនហើយ! បន្ថែមពីលើនេះកម្រិតចំណង់ផ្លូវភេទរបស់មនុស្សអាចផ្លាស់ប្តូរក្នុង រយៈពេលដ៏ខ្លី ឬក្នុងដំណើរជីវិតរបស់គេ គេអាចមានចំណង់ផ្លូវភេទរហូតដល់ចុងបញ្ចប់នៃជីវិត បើទោះបីជាការ ឆ្លើយតបខាងរាងកាយ របស់គេមានការផ្លាស់ប្តូរទៅតាមអាយុក៏ដោយ។
ធីតា៖ ហើយចុះ តើកត្កាអ្វីទៅដែលជំរុញអោយមានចំណង់ផ្លូវភេទ?
វត្តី៖ កត្តាសង្គម សញ្ចេតនា និងរូបរាង្គ កាយ បានជួយកំណត់ ចំណង់របស់មនុស្សក្នុងការបង្ហាញពីអារម្មណ៏ផ្លូវភេទ ហើយជារឿយៗ កត្តាទាំងនេះវាមានទំនាក់ទំនងគ្នា។ ដូច្នេះ ហើយ ត្រូវតែធ្វើការគ្រប់គ្រងកុំឱ្យមានបញ្ហា ដូចជាកត្តាសង្គមបានអូសទាញមនុស្សជាពិសេសទៅលើយុវវ័យឱ្យប្រើប្រាស់ នូវគ្រឿងញៀន គ្រឿងស្រវឹងដែលអាចធ្វើឱ្យគេបាត់បង់ស្មារតីនឹង ប្រព្រឹត្តនៅអំពើមិនត្រឹមត្រូវបាន។
ធីតា៖ ហ្នឹងហើយ! ចុះឥទ្ធិពលនៃគ្រឿងស្រវឹង ឬ គ្រឿងញៀនអាចជំរុញឱ្យមានចំណង់ផ្លូវភេទកើតឡើងបានឬទេ?
វត្តី៖ ប្រាកដណាស់! ឥទ្ធិពលនៃគ្រឿងស្រវឹង គ្រឿងញៀន ឬប្រភេទអ័រម៉ូនមួយចំនួនអាចជំរុញឱ្យមានចំណង់ផ្លូវភេទកើតឡើងបាន។ ចំណង់ផ្លូវភេទអាចកើតឡើងបានចំពោះមនុស្សពីរនាក់ទោះបីជាពួកគេមិនដែលស្គាល់គ្នា ពីមុនក៏ដោយ។
ធីតា៖ អូ! សូម្បីមនុស្សមិនធ្លាប់ស្គាល់ក៏អាចមានចំណង់ផ្លូវភេទជាមួយបានដែរ ចុះតើមានវិធីអ្វីខ្លះដើម្បីអោយយុវវ័យចេះគ្រប់គ្រងចំណង់ផ្លូវភេទរបស់ខ្លួនឯងបានទៅ?
វត្តី៖ ប្រការសំខាន់ចំពោះយុវវ័យ គឺត្រូវចេះគ្រប់គ្រងចំណង់ផ្លូវភេទរបស់ខ្លួនដូចជា ការលេងកីឡា អានសៀវភៅ ចេះគ្រប់គ្រងពេលវេលាប្រចាំថ្ងៃ មិនត្រូវមើលឬអានរឿងសៀវភៅអាសអាភាស។តែចំពោះយុវវ័យដែលមិនមានដៃគូអាច(សេពកាមដោយដៃឬក៏សម្រេចកាមដោយខ្លួនឯង) ហើយប្រសិនមានសកម្មភាពផ្លូវភេទ ត្រូវប្រើប្រាស់មធ្យោបាយពន្យារកំណើតដូចជាស្រោមអនាម័យបុរស/ស្ត្រី ថ្នាំគ្រាប់ពន្យារកំណើតអោយបានត្រឹមត្រូវ ដែលអាចរកបាននៅមណ្ឌលសុខភាព ហើយស្រោមអនាម័យមានសារៈសំខាន់ណាស់ក្នុងការបង្ការជំងឺកាមរោគឬមេរោគអេដសន៍។
ធីតា៖ អរ អីចឹង! តើមានវិធីផ្សេងទៀតដែរឬទេ?
វត្តី៖ នៅមានទៀតដូចជា ការចេះគ្រប់គ្រងចំណង់ផ្លូវភេទតាមរយៈការលើកកម្ពស់សីលធម៌ ការគ្រប់គ្រងអារម្មណ៍ និងការគោរពសិទ្ធិមនុស្ស ធ្វើឱ្យសង្គមចៀសវាងបានការប្រព្រឹត្តអសីលធម៌ និងរស់នៅប្រកបដោយសន្តិភាពនិងសុខដុមរមនា។
ធីតា៖ អរគុណច្រើន! វត្តី ដែលបានចែករំលែកចំណេះដឹងដែលមានសារៈប្រយោជន៍ខ្លំាងមួយនេះ។
វត្តី៖ មិនអីទេ! ធីតា ខ្ញុំរីករាយសម្រាប់ការចែករំលែកដើម្បីយល់ដឹងទំាងអស់គ្នា។
ប្រភពនិងឯកសារយោង៖
ឯកសារយោង៖ ក្រសួងអប់រំយុវជននិងកីឡា សៀវភៅថ្នាក់ទី៦ បោះពុម្ភ ថ្ងៃទី២៨ខែសីហា ឆ្នាំ២០២១ ជំពូក១ មេរៀនទី៣ ទំព័រទី១០
ទាញយកឯកសារ
អប់រំសុខភាពថ្នាក់ទី៦